தைபா - 2
நீக்கமறப் பரவும் சுவாசத்தை
விரலால் சுண்டி அழைத்துச் செல்கிறாய்
நான் எங்கிருக்கிறேன் தைபா!
கண்ணாடிக் குடுவைக்குள் விழுந்த
ஐஸ் கட்டிகளாகக் கரைகிறேன்
நீ என்னை முழுமையாகவே அருந்திவிடு!
இருட்டில்
எத்தனை தீபங்கள்தான் ஏற்றுவேன் தைபா...
உன் விழிகள்
அத்தனையையும் அணைத்துவிடுகிறதே!
உன் வீட்டு மாடப்புறாக்களின்
பக்பக்கெல்லாம் எனக்குமட்டும் ஏனோ
ஹக் ஹக்கென்றே கேட்கிறது!
ஏழாவது வானத்தில் நர்த்தமிடும்
விரல்களில்; ஆசையுடன் முத்தமிடுகிறேன்
உன் இமைகளில்
சுருமாவாகப் பூசிக்கொள்வாயா?
- முகமது பாட்சா*
15/07/2020
------------------------------------
தைபா - 3
சிறகுகளில்லாமல் பறக்கமுடியுமா தைபா!
விழுந்து விடாமல்
பறந்து கொண்டேயிருக்கிறேன்
நீ என்னை
பார்த்துக் கொண்டேயிருக்கிறாய்!
அட்சயப் பாத்திரத்தில்
உன் பெயர்கள்தானே நிறைந்து வழிகின்றன...
கொடுப்பதற்கு மனமில்லை
அத்தனையையும்
நானே அருந்திக் கொள்ளவா!
யாசிப்பதற்கு வெட்கப்படுகிறேன் தைபா
காதலைக் காணிக்கையாகவே தந்துவிடு...
உறக்கமில்லாத கண்களுக்குள்
உன்னை மூடி
கொஞ்சம் உறங்கிக் கொள்கிறேன்!
சஜ்தாவில் விழுந்து கிடக்கும் காதலை
சலாம் கொடுத்து அனுப்பி வைக்க
மனமில்லை...
முஸல்லாவிற்கும் சிறகுகளைக் கொடு
விழுந்து விடாமல்
பறந்து கொண்டேயிருப்பேன்!
- முகமது பாட்சா*
16/07/2020
-----------------------------------------
தைபா - 4
இரவின் முஸல்லாவில்தான்
எத்தனை தஸ்பீக்கள்!
நான் பகலை மட்டுமே நேசித்துக்
கொண்டிருக்கிறேன்!
தூக்கத்தைவிட
என் காதல்தான் எத்தனை புனிதமானது!
பஜ்ரில்
விழித்துக் கொள்ளும் பகலுக்கும் கூட
உன் மீதுதானே காதல் தைபா!
பட்டாம் பூச்சியின் சிறகுகளில்
பகலை எழுதிவிட்டு
என்னை
இரவின் திக்ருகளில் ஏங்க வைக்கிறாயே!
உன் வீட்டுப் புறாக்களின் கூட்டில்
ஓர் இடத்தைக் கொடுப்பாயா?
உன் பெயரையே
ஓயாமல் உச்சரித்துக் கொண்டிருப்பேன்!
- முகமது பாட்சா*
17/07/2020
No comments:
Post a Comment