தீவிரவாதிகள்

துப்பாக்கியைப் பற்றிக் கவிதையெழுதியவன் 
துப்பாக்கியால் இறந்து கிடந்தான் 
துப்பாக்கிகள் எப்போதுமே 
தீவிரவாதிகளை மட்டும்தான் சுடுகிறது... 
இதுவரை இறந்தவர்களின் எண்ணிக்கை 
163428 
வேண்டுமென்றால் எண்ணிக் கொள்ளுங்கள் 
தயாரித்த ரவைகளின் எண்ணிக்கையே அவ்வளவுதான் 
மக்களை மட்டும் காணவில்லை 
ஆதார் அட்டைகள் 
தெருவெங்கும் சிதறிக் கிடக்கின்றன 
புல்லட் ஃபுரூப் ஆடைகளை 
அமேசானில் பதிவிறக்கி வாங்கிக் கொள்ளலாம் 
சுடப்பட்டவர்கள் தீவிரவாதிகள்தான் 
நடிகரின் வாக்கு மூலம் போதும் 
மக்கள் 
இப்போதுதான் நிம்மதியாக உறங்குகிறார்கள் 
ஹிட்லர் சுட்டதும் கூடத் தீவிரவாதிகளைத்தான் 
இல்லையென்றால் 
அவர்கள் ஹிட்லரையே சுட்டிருப்பார்கள் 
எத்தனை பயங்கரம்! 
மக்கள் எங்கே என்று மட்டும் கேட்டுவிடாதீர்கள் 
அவர்கள் அரசாங்க பாதுகாப்பில் 
பத்திரமாகவே இருக்கிறார்கள் அமைச்சர்களாக 
மக்களுக்கே தெரியும் சுடப்பட்டவர்கள் 
நிச்சயம் தீவிரவாதிகள்தானென்று 

- மு.முகமது பாட்சா* 
05 /06 /2018