ஊதாத புல்லாங்குழல் - ரமலான் - 13

ஊதாத புல்லாங்குழல் - ரமலான் 13

ஒரு சூபியின் இருப்பிடத்தில் 
என்னவெல்லாம் இருக்குமென்று 
ஒருவன் ஆய்கிறான்... 
காலியான தோல் துருத்தியுடன் 
அழகாகக் கவிழ்த்துவைக்க பட்ட குவளையொன்று 
ஓரமாய் ஓர் ஓலைப்பாய் 
குளிர்ச்சியுடன் எரியாத அடுப்பு... 
பத்திரமாய்ப் பாதுகாக்கப்பட்ட 
ஒன்றிரண்டு ரொட்டித் துண்டுகள்...
ஒட்டைகளுடன்
ஊதாத புல்லாங்குழல்... 
தலைப் பலகையுடன் சாக்குத்துணி... 
இதென்ன வாழ்க்கை என வியம்புகிறான்.. 
ரூஹில்லாத தேகம் நாற்றம் 
நறுமணம் இதற்கெதற்கு? 
எனக் கேள்வியுடன் தஸ்பி உருள்கிறது... 
'நிரம்பாத எதுவும் 
பிறருக்காகவே நிரம்புகிறது மகனே... 
இதிலெதற்குப் பெருமையின் ஒப்பனை?'
வெளிச்சத்தை 
வார்த்தைகளில் வாங்கிக் கொண்டவன் 
அதானுக்குள் நுழைகிறான் 
பள்ளிவாசல் தொழுகையால் நிரம்புகிறது.

- மு.முகமது பாட்சா*
20/05/2019