எந்த நோன்பை நாங்கள் திறக்க - ரமலான் 18
நாங்கள் எங்களின் பெயர்களைப்
பதிவு செய்து கொண்டோம்
அனேகமாக இன்று மாலை
சில ரொட்டித்துண்டுகள் கிடைக்கக்கூடும்...
இன்றும் நோன்பு தொடர்கிறது
இன்றும்
சில ஜனாசக்களின் ஊர்வலம் இருக்கும்
குண்டுகள் எப்போதும் விழலாம்
பூட்ஸ் கால்கள் உள்ளே நுழைவதற்கு
நேரங்கள் கிடையாது....
துவாவிற்கு ஏந்திய கைகள்
சிதறிக் கிடப்பதைப் பார்த்திருக்கிறீர்களா?
பசிகளின் மீதுதான் யுத்தம் என்பது
இழிவான வரலாறு...
நட்சத்திரங்களும் பிறையும்
ஒரே வானத்தில்தான் பிரகாசிக்கின்றன...
மேகங்கள் ஒருமித்து நகர்கிறது
மோசசும் ஈசாவும் ஏன் ஸல் முகம்மதுவும் கூட
இறைத்தூதர்கள் என்பதை மறந்து விட்டீர்கள்
இரத்தத்தின் மீதும்
சதைகளின் மீதும்தான் இறைவனின் பெயர்
எழுதியிருக்கிறதா ?
ஹலீமா அழுவது எதற்கென்று
உங்களில் யாருக்காவது தெரியுமா?
திக்ரு நிலைகளில்
துப்பாக்கிகளை நிற்க வைத்துவிட்டு
ருக்கூவில் எதைத்தான் தேடுகிறீர்கள்?
சஜ்தாவில் வீழ்ந்து கிடப்பவையெல்லாம்
இறைவனின் அறியப் படைப்புகள் ...
இஷாவின் அழைப்பு தொலைவில் கேட்கிறது
யா அல்லாஹ்!
எந்த நோன்பை நாங்கள் இப்போது திறக்க?
- மு.முகமது பாட்சா*
25/05/2019
No comments:
Post a Comment