இலக்கணப் பிழை

நீ கொடுத்த கடிதத்தில் 
சந்திப் பிழை அதிகம். 
நம் 
சந்திப்பிலும் பிழை அதிகம்! 
வல்லினம் மிகா இடத்தில் 
வல்லினம் மிகுகிறது. 
உனது 
அதிகாரம் போல்! 
குறிலை நெடிலாக்கினாய் 
எழுத்தில் மட்டுமல்ல 
உன் குரலிலும் தான்! 
தொடர் புள்ளிகள் 
வருமிடத்தில் 
முற்றுப் புள்ளிகளை 
விதைத்திருக்கிறாய்! 
காதலுக்கும் சேர்த்தே! 
எழுத்தின் அதிகாரம் 
கட்டளைகளாக... ? 
என் நேசம் 
ஆச்சரியக் குறியில் 
குவிந்திருக்க! 
வார்த்தைகளின் இடைவெளி 
எழுத்துகளில் நுழைந்து 
வார்த்தைகளை 
சிதைத்துச் சிரிக்கிறது. 
உன் நேசமும் தான்! 
மொத்தத்தில் 
உன் கடிதம் போலவே 
நம் காதலும் 
இலக்கணப் பிழைதான்! 

- மு.முகமது பாட்சா
19/11/2015