சீட்டுக் கட்டுகளை
கலைத்துப் போட்டுவிட்டு
உட்கார்ந்திருக்கிறோம்
சீட்டுகள் பரிமாறப் படுகின்றன
சீட்டுகளை
அடுக்கும் போதுதான் தெரியும்
ஆட்டம் எப்படி நகருமென்று
ஒரு துளி விஷமாய்
மது உள்ளிறங்குகிறது....
எப்படியும் ரம்மி
யாருக்கும் உடனே சேர்ந்துவிடாது,
அத்துணைப் பேருமே
நல்ல ஆட்டக்காரர்கள்....
"ஜோக்கர்" - அஃதென்ன
படிமக் குறியீடென்றே தெரியவில்லை,
அரசனையும் கூடச் சில நேரம்
இறக்கி விடுகிறார்கள்,
நல்ல ஆட்டக்காரன் எப்போதுமே
புன்னகையைத் தொலைப்பதில்லை,
குறிப்பறிந்தால்
சீட்டுகள் கீழே இறங்கித் தொலைக்காது
பலவீனம் மட்டுமே
மதுவின் கோப்பையில்
எப்போதும் அமர்ந்திருக்கும்,
விடுதியின் மூலையில்
எங்காவது எவனாவது
அமர்ந்து சிரித்துக் கொண்டிருந்தால்
அவனைப் பார்த்து நகைக்காதீர்கள்,
அவன்தான்
வாழ்க்கையின் படிமக் குறியீடு
"சரியாக விளையாடத் தெரியாதவன்".
- மு.முகமது பாட்சா*
No comments:
Post a Comment