தேச பக்தி

தேசிய கீதத்திற்கு எழுந்து நிற்கிறோம், 
தேசியக் கொடியும் 
எங்களின் சட்டைகளில், 
பெரும்பாலும் திருடர்கள்தான் 
கொடிகளை ஏற்றுகிறார்கள், 
நரம்புகளில் நகரும் நாக்குப் பூச்சிகளை 
மறைத்துக் கொள்கிறோம் , 
இராணுவ உடையணியாத 
சிப்பாய்களாம் நாங்கள், 
தேசத்தின் நலனைக் காக்க 
எங்களின் முதுகுகளை 
வளைக்கச் சொல்லுகிறார்கள், 
முதுகில் ஏறி நிற்கும் அம்பானிகளை 
யார்தான் இறக்கிவிடுவது ? 
எங்களின் வீட்டிலெரியும்
ஒற்றை விளக்குகள் எரியத்தான் 
அணு உலைகளையும், நாங்கள் 
அனுமதிக்கிறோம் ! 
எங்களின் இரணமெல்லாம் ஆறிவிடுமாம் 
புண்களுக்கு மருந்தாக 
பொட்டாசியம் குளொரட் தரப் படுகிறது , 
பணமில்லா பரிவர்த்தனைக்கு 
மாறச் சொல்லுகிறார்கள், 
பணமே இல்லாமல்தானே 
இப்போதும் வாழ்ந்து கொண்டிருக்கிறோம் ! 
கொத்தடிமைகள் கூட 
பணமில்லா பரிவர்த்தனையில் வாழ்வதாகத்தான் 
வரலாற்று நிகழ்வுகள் சொல்லுகின்றன ,

வாருங்கள், 
திரையரங்கின் தேசிய கீதத்திற்கு 
எழுந்து நிற்போம் 
இராணுவத்தின் சிப்பாய்களாய் 
ஒற்றுமையாக!

-மு.முகமது பாட்சா 15/12/2016