கிறிஸ்துமஸ்

கூட்டல் குறிப் போட்டு 
சிலுவை என்கிறாள் 
அந்தச் சுட்டிப் பெண்

கோமாளித் தாத்தா 
கொடுத்தப் பரிசில் 
பார்பி பொம்மை

குடிலுக்கு 
குச்சியை நட்டு விட்டு 
குடிலையே 
தான் தான் அமைத்ததாய் 
பெருமைச் செய்கிறாள் 
ரோஸ்லினா

"ஏம்ப்பா.., 
ஏசுவும்,முருகரும் 
ஃபிரண்டா?" 
எனக் கேட்கிறாள் 
கிரேஸியா!

"அப்பா, 
அவளுக்கு ஒன்றும் 
தெரியவில்லை.. 
அல்லாவும், ஏசுவும் தான் 
ஃபிரெண்ட்?" 
என்றுச் சிரிக்கிறான் 
ஸ்டீஃபன்!

ஜார்ஜிக்கோ 
பதில் சொல்லத் தோன்றவில்லை

மகிழ்ச்சியிலேன் 
மதத்தை நுழைக்க வேண்டும்?
அப்படியே 
இருந்து விட்டுப் போகட்டும்... 
ஏசுவின் பிறந்த நாள்

கிறிஸ்துமஸ் வாழ்த்துகள்!

- மு.முகமது பாட்சா* 
24/12/2016