ஏதோ ஒன்று நழுவுகிறது

எதையோ ஒன்றைத் தேடிச் செல்கிறேன் , 
ஏதோ ஒன்று 
நழுவி போய்க் கொண்டே இருக்கிறது ! 

நேற்று என்னிடம் இருந்ததை 
இன்று தொலைத்து விட்டேன் , 

இன்றையை, 
நாளைக்குத் தொலைத்து விடுவேன் , 
இல்லையென்றால் , 
நானே கூடத் தொலைந்து விடுவேன் ! 

வழித் துணைக்குத் துக்கங்களை 
கூடவே அழைத்துச் செல்கின்றேன் , 
அவைகள் , 
வழிகளை ,பின்னோக்கியே 
காட்டி அழைத்துச் செல்கின்றது ! 

நானொன்றும் 
வரலாற்றுப் பிழையாக இருக்க முடியாது ! 
வரலாறுகள் 
அவ்வப்போது திருத்த படுகின்றனவாம் ! 
நான் நிச்சயமாக வாழ்க்கைப் பிழைதான் ! 

உறவுகளின் தேடலில் 
நான் ஓர் ஒற்றைப் புள்ளிதான் , 
என் தேடல்களில்தான் 
உறவுகள் விரிகின்றது சமுத்திரமாக ! 

நான் , ஆசைகளைத் தேடிப் போகிறேன் , 
வாழ்க்கையோ 
என் மரணத்தைத் தேடிப் போகிறது ! 

என் தேடல்கள் கிடைக்காமல் போகலாம் ! 
வாழ்க்கையின் தேடல் 
அதற்கு நிச்சயமாகக் கிடைத்துவிடும் ! 

ஆனாலும் , 
எதையோ ஒன்றைத் தேடிச் செல்கிறேன் , 
ஏதோ ஒன்று 
நழுவி போய்க் கொண்டே இருக்கிறது ! 

- மு.முகமது பாட்சா