இறுதிக் குழி

வஃபாத்தாகி விட்டதாக 

உறவுகள் கூடி அழுகின்றது... 

அல்லது 

அழுவதாய் நடிக்கின்றது, 

புதைக் குழி 

தோண்டி விட்டார்கள் ... 

இது போன்ற குழிகளை

இவனும் 

அடிக்கடிப் பார்த்தவன் தான் ! 

இதுதான்

இவனுக்கு இறுதிக் குழி ,

இனி யாரும் இவனுக்கு

பள்ளம் தோண்ட மாட்டார்கள்,

சந்தூக்கின் பாரம் 

சற்று அதிகம் தான் ,

ஆசைகள் மிச்சமிருக்கின்றது 

அதுதான் கனக்கின்றதாம்,

விட்ட சொத்தில் 

ஏதாவது தேறுமாயென்று 

கணக்குப் போட்டவனின் 

தடித்த வார்த்தை , 

மூக்கி னோரம் வழிந்த 

உதிரக் கரைசலில் 

மூக்கைப் பொத்தி நிற்கிறான் 

மூத்த மகன் ,

துக்கங்களைச் சுமந்து தான் 

மூடுகிறார்கள் 

குழியை... பிள்ளைகள் , 

விசும்பலும் அழுகையும் 

மூன்றாம் நாளில் 

எல்லாம் ஒருசேர முடிந்துவிடும், 

துவாக்களின் நேசத்தில் 

ஆமின்கள் இங்கு 

சற்று அதிகம் தான் , 

ஆசைகளைச் சுமந்த 

அடுத்த மய்யத்துகள் 

"இதுதான் வாழ்க்கை" யென்று 

தத்துவம் பேசி கலைகின்றது.. 

- மு.முகமது பாட்சா