திறக்காத கதவுகள்

அறையின் கதவுகளை அடைத்துவிட்டு 
எங்களை வெளியே வரச் சொல்கிறீர்கள் 
நாங்கள் எப்படி வரமுடியும் ? 
கதவுகள் திறக்கமுடியாத சிக்கலில் 
சிக்கிக் கிடக்கின்றன 
பழமைகள் துருப்பிடித்து 
அழுத்திக் கொண்டதால் இருக்கலாம் 
அரசியல் சுய நலத்தின் அழுக்குகள் 


அடைபட்டதாலும் இருக்கலாம் 

திறக்கும் முயற்சிகளில் 
நாங்கள் எப்போதும் ஈடுபட்டதே கிடையாது 
உள்ளிருந்து வெளிவருவதற்காக 
கத்திக் கொண்டுதான் இருக்கிறோம் 
யாராவது வந்து கதவைத் திறந்து விடுங்கள் 
உங்களை மிதித்துவிட்டு 
நிச்சயம் வெளியே வந்து விடுவோம் 
நாங்கள் சுத்தமானவர்கள் 
எங்கள் கைகள் அழுக்காவதை மட்டும் 
நாங்கள் என்றுமே விரும்புவதில்லை 
இல்லையென்றால் ஓர் ஓட்டையைப் போட்டு 
வெளிச்சத்தை உள்ளே நுழையுங்கள் 
விடிந்துவிட்டதாக எண்ணியே 
வாழ்ந்து விடுகிறோம்...

- மு.முகமதுபாட்சா