அவளின் கோப்பை

நான் உபயோகிக்கும் 
இந்தத் தேநீர் கோப்பையில் 
அவளின் ஸ்பரிசங்கள் 

உட்கார்ந்திருக்கின்றன 
அவளின் மூச்சுக் காற்று 
அதற்குள் நுழைந்து 
ஆவியாக வெளியேறியதை 
பார்த்திருக்கிறேன் 

அவள் விரல் பிடிக்கும் அழகில் 
நான் கோப்பையின் பிடியானதுண்டு 
கோப்பையினோரத்தில் 

இதழ் பொருத்தி , நிறுத்தி 
மெல்ல விலக்கி 
கண்களை மூடி 


தொண்டைக்குள் அனுப்புமழகில் 
நான் மிடறியதுண்டு... 
அவள் இல்லாத நேரங்களில் 
கோப்பையுடன்தான் 
பேசிக் கொண்டிருக்கிறேன் 
அஃதுதான் அவளின் முத்தத்தை 
இடம் மாற்றி வைக்கிறது 

கோப்பையை யாரும் 
உடைத்துவிடாதீர்கள் 
அஃதொன்றாவது என்னிடம் 
தினம் பேசிக் கொண்டிருக்கட்டும் ! 

- மு.முகமது பாட்சா